Andreas Dei gracia Hungarie, Dalmacie, Croacie, Rame, Seruie, Gallicie, Lodomerie, Cumanie, Bulgarieque Rex omnibus Christi fidelibus tam presentibus quam futuris presens scriptum inspecturis salutem in eo qui est uera salus. Celsitudo Regia et benignitas Regalis sibi subiectos ad gradum extollere alciorem, qui sibi fideliter seruierunt; tanto namque euidencius Serenitas Regia Regno prospicit et Corone, quanto diligencius ob fauorem rei publice auget numerum bellatorum. Hoc Regali moderamine cogitantes ad uniuersorum tam presencium quam futurorum noticiam harum serie volumus peruenire, quod considerantes fidelissima obsequia et obsequiosissimas fidelitates, que nobis et Regno nostro Radizlaus, Inabur et Boych, filij Radizlai, nobiles iobagiones quondam Castri nostri de Bana, ut fideliter sic feruenter in diuersis expedicionibus Regni nostri inpenderunt; specialiter illud attendentes ex animo et pensantes ex penetralibus cordis nostri, quod prefatus Radizlaus, derelicto et quasi pro nichilo habito solo proprio et propria patria procul posita, ob fauorem nostrum et fidelitatem nobis inpendendam, vna cum Magistro Demetrio Comite Posoniensi et de Zolum dilecto fideli et familiari nostro ad mandatum nostrum speciale ad inpendendum adiutorium seu auxilium karissimo patri nostro Alberto Dei gracia nunc Regi Romanorum et Semper Augusto,. tunc Duci Austrie, in partes exteras et remotas, uidelicet citra et ultra Renum, non parcendo persone sue, neque rebus, se excepit, ubi inter alios fideles nostros ibidem per Nostram Maiestatem destinatos, ut tyro fortis dimicans, in exercitu, Odolphi quondam Regis Alamanie, una cum illis quos suis stipendijs et sumptibus adduxerat, stragem fecit non modicam memoria recolendam; ex quo quidem exercitu Odolphi ad laudem et gloriam nostram et tocius Nacionis Hungarie comprehensis strennuis mulitibus, adduxit ad exercitum et presenciam prefati domini Al. Regis Romanorum captiuis uinculis mancipatos ad exilarandum et letificandum dominum Al. Regem et ipsius exercitum ex diuersis mundi partibus congregatum. Et licet ob huiusmodi, sicut prefatum est, seruicia multiplicibus laudum preconijs deberet tam ipse Radizlaus, quam ab ipsum tocius generacionis sue genealogia decorari: tamen de Consilio Baronum, Consiliariorum, Procerum nostrorum nostro lateri adherencium, ad instantem nichilominus peticionem et petitam instanciam Magistri Demetrij. Comitis Posoniensis et de Zolum iam prefati, eisdem Radizlao, Inabur et Boych filijs Radizlai, Cosme filio Nycolai, Petro filio Vochlo, Nicolao filio Fonch, Laurencio filio Stephani; Chobo filio Radizlai, Paznan filio Vyda, Iwanka filio Mantha, Martino filio Myleth, nobilibus iobagionibus Castri de Bana prope fluuium Wag existentibus, hanc graciam duximus faciendam, quod de cetero exempti a iobagionatu Castri prefati, cum vniuersis possessionibus, terris et uillis suis prerogatiua nobilium et nobilitatis titulo ab antiquo decoratorum gaudeaut et letentur, et in cetu nobilium Regni nostri cum omnibus possessionibus suis seruatis in omnibus condicionibus et prerogatiuis nobilium habeantur ipsi et ipsorum heredes heredumque suorum successores pacifice et pariter inconcusse. Vt igitur huius exempcionis nostre series robur obtineat perpetue firmitatis, presentes concessimus dupplicis sigilli nastri munimine roboratas. Datum per manus venerabilis patris fratris Authoni Dei gracia Episcopi Chanadiensis de Ordine Fratrum Minorum, Aule nostre ViceCancellarij dilecti et fidelis nostri anno Domini MşCCş nonagesimo octauo, Regni autem nostri anno nono.
(Eredetie bőrhártyán, a függő pecsét elveszett; a budai kir. kamarai levéltárban.)