Johannes Episcopus seruus seruorum Dei venerabili fratri Salvio Archiepiscopio Ragusino salutem et Apostolicam benedictionem. In supreme specula dignitatis quamquam immeriti disponente Domino constitnti circa generalem curam Ecclesiarum omnium iuxta pastoralis officij debitum sollicita diligentia et diligenti sollicitudine vigilamus; sed ad illas potissime, que viduitatis deplorant incommoda, tanto attentius nostre considerationis retorquemus intuitum, tantoque studiosius, ut eis pastores preficiantur ydonei, opportunos labores, quantum nobis permittitur ex alto, incessanter impendimus, quanto intuemur manifestius, quod ex talium administratione pastorum fructus uberes spiritualiter et temporaliter eisdem possunt Ecclesijs prouenire, ad quarum procuranda commoda promptis ac totis desiderijs aspiramus. Felicis siquidem recordationis Clemente Papa predecessore nostro venerabilem fratrem nostrum Aleardum professorem Ordinis Minorum Arborensem, tunc Ragusinum Archiepiscopum, ad Arborensem Ecclesiam transferente, ad propter hoc Ragusina Ecclesia remanente destituta pastore, Capitulum seu Canonici Ragusini Andream Gausonem de Venetijs Canonicum Paduanum de facto in Ragusinum Archiepiscopum elegerunt; qui ad eandem Ragusinam Ecclesiam accedens personaliter, nulla licentia habita, vel confirmatione obtenta a Sede Apostolica, in spiritualibus et temporalibus impudenter administrauit ibidem. Et tandem ex parte pie memorie Gregorij Pape decimi predecessoris nostri citatus legitime in prefixo sibi termino peremptorio personaliter coram eo comparere postposuit; sed quemdam procuratorem ad ipsius predecessoris nostri Gregorij presentiam destinauit, qui electioni huiusmodi et omni iuri, quod eidem canonice competebat ex ea, nomine ipsius Canonici, a quo super hoc speciale mandatum habebat, sponte et expresse renunciauit in manibus predecessoris eiusdem. Unde licet ministerium tuum Tribuniensis Ecclesie, cui, sicut accepimus, laudabiliter prefuisti, utile valde foret; Nos tamen de ordinatione ipsius Ecclesie Ragusine taliter pastore carentis sollicite cogitantes, ac talem illi preesse Pontificem affectantes, quem laudabilia sua merita redimerent, cuiusve non esset dubia caritas erga plebem sue sollicitudini commendandam, in te tunc Tribuniensem Episcopum, cui vite honestas, commendabilis conversatio et sufficiens litterarum scientia suffragantur, quique spiritualium providentiam et circumspectionem temporalium obtines, nec non feruidam caritatem geris circa prosperum statum illius regionis, unde originem produxisti, oculos direximus mentis nostre. Quapropter tam eidem Ecclesie Ragusine, cuius in hoc utilitatem euidentem specialiter attendimus, quam gregi dominico paterna intendentes diligentia prouidere, teque a vinculo, quo tenebaris astrictus eidem Tribuniensi Ecclesie, de fratrum nostrorum consilio absoluentes, ac de persona tua eidem Ragusine Ecclesie prouidentes, te ad ipsam transferimus de Apostolice plenitudine potestatis, transeundi ad sepedietam Ragusinam Ecclesiam tibi liberam licentiam concedentes; Palleo videlicet, quod est insigne pontificalis officij, tibi nichilominus assignato; firma ducti fiducia, quod tu, qui in commisso tibi Episcopatus officio hactenus fideliter et vtiliter diceris ministrasse, de talento tibi credito prestante Domino talenta referas potiora. Rogamus itaque fraternitatem tuam et hortamur attente per Apostolica tibi scripta mandantes, quatenus ad prefatam Ecclesiam Ragusinam, cuius plenam administrationem in spiritualibus et temporalibus tibi committimus, cum plenitudine nostre benedictionis accedens, erga illius curam et regimen sic te fructuosum reddas et sollicitum, quod tua fama clareat per effectum, et in delectationem nobis veniat, te speciali benevolentia prosequi, tuisque votis congruum fauorem propitium impertiri. Datum Viterbii nonis Decembris Pontificatus nostri anno primo.
In eundem modum Capitulo et Clero Eeclesie Ragusine.
In superna etc. (verbis congruentur mutatis usque potiora.) Rogamus itaque vniuersitatem vestram et hortamur attente per Apostolica vobis scripta firmiter precipiendo mandantes, quatenus dictum Archiepiscopum, cui plenam administrationem ipsius Ecclesie Ragusino in spiritualibus et temporalibus duximus committendam, cum ad vos peruenerit, admittentes ylariter et deuote, sibi tanquam patri et pastori animarum vestrarum impendatis obeidentiam et reverentiam debitam, eiusque salubribus mandatis efficaciter intendatis; ita quod ipse letetur in vobis deuotionis inuenisse filios, et vos in eo per consequens patrem habere beneuolum gaudeatis; alioquin sententiam quam ipse tulerit in rebelles, faciemus auctore Domino usque ad satisfactionem condignam inviolabiliter observari. Datum ut supra.
In eundem modum Comiti et Communi Ciuitatis Ragusine.
In suprema etc. usque animarum vestrarum honorificentiam debitam impendatis, eiusque salubribus etc. usque gaudeatis. Datum ut supra.
In eundem modum Suffraganeis Ecclesie Ragusine.
In suprema etc. usque deuote sibi tanquam Metropolitano vestro impendatis obedientiam etc. usque intendatis; ita quod mutue caritatis studio vobis et ei materia libere prosperandi proueniat, et tandem pacis eterne solatium largiente Domino cumuletur. Datum Viterbij tercio nonas Decembris Pontificatus nostri anno primo.
(Farlati, Illyricum Sacrum VI. köt. 113. l.)