Bela Dei gracia Vngarie, Dalmacie, Croacie, Rame, Seruie, Gallicie, Lodomerie Cumanieque Rex universis Christi fidelibus presens scriptum inspecturis, salutem et omni bonum. Quanto Regalis providencia ceteros dignitatis auctoritate precellit, tanto ea, que per ipsius Maiestatem salubriter ac provide ordinantur, firmiori debent robore stabiliri. Proinde ad universorum noticiam tam presencium quam posterorum harum serie volumus pervenire: quod acccedentes ad nostram presenciam Hodina Comes cum cognatis suis, videlicet Gurka, Peter, Bogdan et Bothochin, nobis sua peticione monstrarunt, quod pro terra quadam Wyschust nomine, sita in Comitatu Simigiensi, quam eis nostro privilegio ob fidelitatem suam et servicia multimoda nobis et Corone Regie fideliter impensa contuleramus, Banus unumquemque ipsorum singulariter compelleret, tam suo exercitui quam nostro, officium exercitus exhibere. Sed cum terre dicte utilitas tanti servicii laboribus et expensis non subpetat, talem eisdem graciam et merito duximus faciendam: quod de quinque iobagionibus supradictis, nostro et Bani exercitui unus eorum cum equis et armis decentibus service teneatur. Ita eciam, quod post decessum eorum heredes seu successores eorundem prenominata gaudeant libertate, nec nos, seu successores vel iobagiones Regni hanc libertatem infringendi habeant potestatem. Ut igitur hec nostra concessio perpetue firmitatis robur obtineat, nec possit in posterum per quempiam retractari, presentes litteras concessimus ad maiorum rei firmitatem, duplicis sigilli nostri munimine perhenniter roboratas. Datum anno Domini MCCXLVI., quinto ydus Aprilis, Regni autem nostri anno undecimo.

(Tkalcsics, Monumenta hist. Episcopatus Zagrabiensis I. köt. 87. l.)