Nos frater Poncius de Fayri Magister Domorum Hospitalis Sancti Johannis Iherosolimitani per Vngariam et Sclauonim significamus vniuersis quibus expedit, quod nos cum vniuersis fratribus nostris in Capitulo nostro in die Asscensionis Domini in Chorgo celebrato nobiscum consedentibus, videlicet fratre Vgone Boraldy Preceptore de Chorgo et de Vduorheel ac vices nostras gerente, fratre Gvyllermo de Sancto Paulo Preceptore de Chychan, fratre Vgone de Monte Claro Preceptore de Alba, fratre Margarita Preceptore de Bela, fratre Petro Ymbertho Preceptore de Zyrak, et alijs quam plurimis, consideratis multiplicibus seruicijs et fidelibus Comitis Perchyni, Potestatis de Monte Grecensi, et Anthonij fratris sui, que Domui nostre in diuersis necessitatibus fideliter impenderunt, et intendunt impendere in futurum, in quibus ijdem pro honore et libertate Domus nostre laborem suum continuum expenderunt, que si precio debuissent comparari, cum quingentis marcis Domus nostra potuisset minime comparasse; quasdam terras Domus nostre, vacuas et quasi desertas, Mynor Peschenycha et Lykenik vocatas, cum omnibus vtilitatibus et pertinencijs earundem; quarum vnam, videlicet Mynor Peschenycha, Borch et Zloyna cum fratribus eorum ex parte Domus nostre quondam tenuerant, de quibus Domus nostra uix annuatim vnius marce reditum percipiebat, dedimus, contulimus et tradidimus ipsi Comiti Perchino et fratri suo antedicto, et per eos eorum heredibus heredumque successoribus iure feudi perpetualiter possidendas, pacto huiusmodi interiecto: quod nulla possimus ab eisdem et heredibus eorum in futurum auferre racione, nisi in manifesta infidelitate contra Domum nostram perpetrata notarentur, nec eciam per successorem nostrum aliquatenus possit retractari. Preterea in siluis ad Domum nostram de Chychan spectantibus, excepta silua Owas vocata, tam porci dicti Comitis Perchini et fratris sui, quam eciam populorum suorum super dictis terris commorancium sine aliqua exaccione tributi pascantur, et ligua tam pro hedificijs domorum, quam pro vsu recipiant, contradiccione qualibet non obstante. Item tenebuntur nobis in desscensu, prout in alijs litteris nostris eisdem concessis continetur. Omnia autem iura terrarum ipsarum tam in marturinis, quam in alijs exaccionibus et collectis, que per terram Domus nostre currere consueuerunt, Comes Perchynus et frater suus, ac eorum heredes obtinebunt; et collectam Regiam, quam in Regno fieri contigerit, nos et fratres nostri sub condicione libertatis Domus nostre, quam ex gracia Regia obtinuimus, uel in futurum obtinere poterimus, ipsi Comiti Perchino et fratri suo, ac eorum heredibus contulimus. Adicimus eciam, quod dicti populi Domus nostre nec iudicio Preceptoris, nec alicuius Officialis Domus nostre astare debeant, sed eosdem Comes Perchinus et frater suus in causis omnibus iudicabit; et si ijdem cuilibet iuxta suum meritum satis non fecerint, coram nobis solummodo, et non aliquo Preceptorum respondere personaliter tenebuntur; preter causas homicidij, quas Preceptor de Chychan vna cum Comite Perchino uel fratre suo iudicabit, et duas partes iudiciorum, in quibus reus uel contumax in huiusmodi causis conuictus fuerit, Domus nostra percipiet, tercia vero pars cedet Comiti Perchino et fratri suo supradictis. Ceterum Domui nostre aut nobis quatuor marcas annuatim nomine pensionis in duobus terminis, videlicet in festo Sancti Georgij, et in festo Beati Martini cum quinque pensis denariorum Zagrabiensium pro marca soluere tenebuntur. Preceptor autem Domus nostre, excepta solucione supradicta, super ipsis terris nil plus penitus obtinebit. Item dicti populi nostri nullo seruicio Domui nostre debito astringentur. Si vero Rex, Banus, uel aliquis Baronum super populos Comitis Perchini, uel super populos nostros desscensum faceret, vnus nostrum pro altero in nullo tenebitur respondere; sed quilibet nostrum per se ipsum desscensum subportabit. Nec hoc pretermittimus, quod nos et fratres nostri predicti obligauimus nos, quod si qui nostrum per litteras predecessorum nostrorum, seu quoeunque modo ipsum Comitem Perchinum et fratrem suum, aut eorum heredes ullo unquam tempore occasione ipsarum terrarum turbarent aut molestarent; ipsa Domus nostra Hospitalis et fratres nostri eosdem defendere tenebuntur. Vt igitur presentis collacionis seu donacionis series salua, inreuocabilis, inretractabilis et inconcussa in perpetuum perseueret; litteras Capituli Ecclesie Zagrabiensis super eadem concessas presentibus confirmamus, sigilli nostri munimine roborando. Datum anno Domini MşCCş septuagesimo quinto.
(Eredetie bőrhártyán, vörös selyemzsinóron függő pecsét alatt; a budai kir. kamarai levéltárban.)