Vniuersis Christi fidelibus presentem paginam inspecturis Capitulum Wesprimiensis Ecclesie salutem in uero salutari. Ad cunctorum cupimus peruenire noticiam, quod Mischa Comes quendam Willemirum, et fratres suos, Eustachium videlicet et Forchasium, et quendam puerum nomine... ad Regis Andree citauit presenciam, obiciens eis, quod eorum fretus consilio Lomb frater ipsorum contra eum extendisset gladium, manum eius dextram detrvncando. Vbi iudicatum est: Si Mischa Comes cum fratribus suis Michaele et Absa coram Capitulo Wesprimiensi super hoc facerent sacramentum, in ulcionem unius dextere prefatorum uirorum quatuor manus truncarentur. Cumque deuentum ad hoc fuisset, et M. Comes cum fratribus suis probare iuxta formam iudicij illud promptus extitisset, presente pristaldo Regis Luca nomine filio Abbe de Sucorov; fratres nostri, ne sanguinis fieret effusio, cum alijs uiris discretis se interponentes in hunc modum composuerunt: Vt Villemirus prefatus et alij tres fratres eius prenominati traderent omnes terras suas et vineas, preter solam terram, quam Villemirus in uilla Kenese habuit, Misce Comiti possidendas. Ipse vero sepe dictus M. pacem cum eis habuit spondens eis eciam eandem amiciciam suis de propinquis. Igitur ad tollendam omnem calumpniam factam, et ut talis composicio rata permaneret et stabilis, placuit nobis super his dare pro testimonio presentes litteras sigilli nostri munimine roboratas. Datum per manus Magistri Johannis Lectoris Vesprimiensis anno Domini M° CC° XX° VII°. Reuerendo domino et patre nostro Bartholomeo Episcopo, Johanne Preposito, Salomone Cantore, Mathia Custode existentibus.

A B C D

(Eredetie bőrhártyán, melyről sárga selyemzsinóron a káptalan pecséte függ, a nmélt. herczeg Batthyáni család körmendi levéltárában.)