Magistro Gualterio inclito Spalati Canonico et Sancte Romane Ecclesie Legato G(regorius) Diocletiane atque Antivarine Ecclesie humilis Minister salutem et sincere dilectionis affectum. Dignitatis Vestre litteras, quas nobis direxistis, summa cum reverentia suscepimus, et earum continentiam intelligentes, innumeras benignitati vestre grates rependere curamus. Quoniam Ecclesie nostre clementer sollicitudinem gerens, que valde nobis congruunt, cum Comite et ceteris nobilibus Spalati locuti estis, quorum prudentie et caritatis compago nobis semper consulere consuevit, Nam Salonitanam Ecclesiam Primatum in tota Dalmatia provincia, et nostre Ecclesie matricem fuisse non ignoramus. Unde in nullo nobis convenit ab ea discrepare, set auxilii et consilii commodum sperare. Itaque magna controversia superveniente, ciuitati nostre a magno jupano factum, quod vobiscum locuti fuimus, prosequi nequivimus; octingentos namque perperos, quos in preterito anno coacti sibi dare promisimus, nunc cum violentia exigit, et quia persolvendi facultas non adest, agrorum nostrorum reditibus ammissis, iterum in nos sevit, iterum minatur juxta quod presbiter Maraldus lator presentium, ocularia fide poterit vobis referre. Unde in tantis perturbationibus et pressuris positi, omnes gemunt at dolent. Knesius quoque Michahel, cui Diocletiane Ecclesie cura et sollicitudo non modica est, ab avunculis molestatus ad ea, que nos cupimus nunc intendere minime valet. Tamen in proximo superna gratia concedente nostre Ecclesie commodum prosequi, et usque ad effectum perducere vestro consilio et auxilio indubitanter speramus.

(Eredetie a bécsi cs. k. titkos levéltárban.)