Nos Andreas Dei gracia Hungarie, Dalmacie, Croacie, Rame, Servie, Gallicie, Lodomerie, Cumanie, Bulgarieque Rex, omnibus Christi fidelibus presentem paginam inspecturis salutem in Domino sempiternam. Fervor fidelitatis eximie et obsequiorum merita subditorum corda Regum et Principum adtrahunt, inducunt et invitant, ut ii, qui serviciis dominicis se immiscent, condigne remuneracionis stipendiis attolantur. Proinde ad universorum noticiam tenore presencium volumus pervenire, quod quia Hannus filius Comitis Herbordi de Cassa, Comes camere nostre Majestatis, oculis nostris meruit multipliciter commendari, nosque ipsius servicia pietatis oculis intuentes, volentesque ipsius fidelitatibus et obsequiis aliquali remuneracionis antidoto obviare, sylvam intra civitates nostras Gelnuchbana et de Cassa situatam seu existentem, ad nostram manum immediate spectantem, desertam, et intensam inter fluvios Mizla et Chernuta vocatos existentem, usque ad fluvios Bela et Kis Gelnuch nuncupatos, prout ad nostram Regiam pertinet Majestatem, eidem Comiti Hannus, et per eum suis heredibus, heredumque suorum successoribus contulimus et tradidimus jure perpetuo et irrevocabiliter possidendam. Et eundem Comitem Hannus in corporalem possessionem dicte sylve et terre per Feldricum Castellanum nostrum de Potok sub testimonio Capituli Agriensis fecimus introduci. In cujus rei memoriam, firmitatemque perpetuam presentes concessimus dupplicis sigilli nostri munimine roboratas. Datum per manus venerabilis patris domini Theodori Dei gracia Episcopi Jauriensis, dilecti et fidelis nostri, aule nostre Vice-Cancellari, anno Domini millesimo ducentesimo nonagesimo septimo, Regni autem nostri anno septimo.

(Kassa város levéltárából. Hatvani Mihály.)