Capitulum Ecclesie Beati Mychaelis Archangeli Transsilvanie omnibus Christi fidelibus presentem paginam inspecturis salutem in omnium salvatore. Quoniam ea que in tempore aguntur ne cum tempore elabantur, ipsa acta ad cautelam, et ut firmius stent et perdurent, patrocinio litterarum consveuerunt roborari. Proinde universorum noticie, tam presencium quam futurorum, harum serie declaramus, quod nobilis iuvenis Mychael filius Comitis Thome de Hydeghovz pro se et pro Nicolao fratre suo carnali, coram nobis personaliter constitutus, confessus est vnum montem valentem pro ope castri, cum quadam modica particula terre et silwa ad ipsum montem inmediate pertinenti, de quadam possessione sua Bulla vocata, metis, ei signis separatum et distinctum, ex bona voluntate fratris sui prelibati ac aliorum cognatorum et propinquorum suorum permissione, pro viginti marcis fini argenti, populis de villa Heoholm, pro quibus et ex quibus Andreas filius Hermani de ipsa villa comparuit, vendidisse, et ipsam pecuniam idem Mychael plenarie recepisse dixit ab eisdem, obligando se dictus Mychael, vt si processu temporis, predicti populi de Heoholm, racione dicti montis vel attinencium suorum predictorum, per quempiam inpeterentur vel in jus traherentur, idem cum prefato fratre suo, et sui successores, populos sepefatos expedire tenerentur propriis laboribus et expensis, et in pacifica possessione dicti montis indempniter conseruare. In cuius rei memoriam, testimonium, perpetuamque firmitatem presentes concessimus litteras, sigilli nostri munimine roboratas. Datum Mychaele Preposito Electo Zagrabiensi, Gregorio Cantore, Paulo Custode, Andrea Decano Ecclesie nostre existentibus, anno Domini millesimo ducentesimo nonagesimo sexto.

(Teutsch és Firnhaber id. m. I. köt. 197. l.)