Omnibus Christi fidelibus presentibus pariter et futuris Capitulum Ecclesie Waradiensis presencium noticiam habituris salutem in omnium saluatore. Noticie vniuersorum harum serie uolumus declarare, quod Dominico et Demetrio Comitibus filiis Nycolai, ac Petro filio Johannis filii Farkasij ab una parte; item Comite Nycolao filio Tybe ab altera coram nobis personaliter constitutis, ijdem Dominicus, Demetrius et Petrus Comites super facto terre seu possessionis Feketeupotok uocate in Comitatu de Wgocha existentis, pro qua contra ipsum Comitem Nycolaum filium Tybe judiciario ordine procedere intendebant, ut dixerunt, quia a commetaneis et vicinis dicte possessionis Feketeupotok, et specialiter in priuilegio domini Stephani Regis Hungarie felicis recordacionis comperissent, ipsam possessionem ex donacione eiusdem domini Stephani Regis per ipsum Comitem Nycolaum filium Tybe pro fidelibus seruiciis suis et sanguinis effusione multimoda fuisse possessam, quas quidem litteras siue priuilegium dicti domini Stephani Regis super collacione eiusdem possessionis Feketeupotok confectas, et nobis per ipsum Comitem Nycolaum exhibitas fide uidimus occulata et perlegimus, preuia racione ijdem Comites opinioni et intencioni eorum in hac parte resipuissent, ymo quia eisdem ipsa possessio attinuisset, et ab ipsis fuisset alienata, in nostri presencia per ipsos ab ipso Nicolao, receptis nichilominus sexaginta marcis, ipsam possessionem prefato Nycolao ex bona eorum uoluntate, et suis heredibus, heredumque suorum successoribus perpetuo possidendam cum suis omnibus vtilitatibus et pertinenciis statuerunt pleno iure, prout ex donacione memorati domini Stephani Regis dinosscitur possedisse, nemine contradicente, sub metis et terminis infrascriptis, ex tenore predicti priuilegii dicti domini Stephani Regis extractis et rescriptis. Quarum prima incipit, dum exiretur de fluuio Borsua a parte fluuii Pasuncha, ubi separatur a Bereg et adiungitur possessioni Regali Ordou uocate; deinde per ipsum fluuium currendo in inferiorem partem cadit in fluuium Beberke, et per ipsum fluuium inferius eundo peruenit ad duos fluuios Kethchenge uocatos; exeundo autem deinde sunt due mete terree; et ab hinc uergit ad orientem, et peruenit ad minorem fluuium Chenge, ubi ipse fluuius transitur; abhinc pergendo itur per superiorem partem silue Byk dictam uersus orientem, ubi peruenitur ad quendam montem, et ibi sunt in asscensu eiusdem montis due mete terree; deinde parum pergendo peruenit ad uiam, que Warutha dicitur; exinde uadit ad syluam Kerezthbyk dictam, quam transit eundo ad partem meridionalem; abhinc uadit ad quendam locum fluuij, qui Ilounukeurene appellatur, ubi in introitu silue Ilounuk sunt due mete terree; abhinc uero transit ad locum Fyleluchka dictum, et ipsum locum transeundo itur ad fluuium Belua uocatum; deinde uadit ad Chakanegefoka, et abhinc itur ad partem meridionalem, ubi separatur a terra Ordou et adiungitur terre Werheuch; et exinde procedendo peruenit ad stagnum Kendurattou uocatum, ubi sunt due mete terree a parte occidentali; abhinc uadit ad uiam, que de eadem villa Feketeupotok uenit, ubi adiungitur lacui Alcalpotok dicti, qui cadit in fluuium Werbevch, de quo fluuio parum eundo separatur a terra Werbeuch, et adiungitur terre Isou, de qua in pascuis pergendo uadit uersus aquilonem, et peruenit ad fluuium Zalua nomine; exinde uero ad partem inferiorem usque stagnum Prenez dictum eundo transit ad terram Koazoa dictam, que est possessio Regalis; et ab eadem parte aquilonis peruenit ad lacum Ataab dictum, et per ipsum lacum eundo cadit in fluuium Batnuka nominatum, per quem itur ad predictum fluuium Borsua, et abhinc peruenit ad fluuium Pasuncha memoratum ad metam priorem; et sic mete prelibate possessionis Feketeupotok terminantur, sicut in priuilegio prefati domini Stephani Regis comperimus seriose, et fide uidimus occulata, prout eciam superius annotatur. Qui quidem Comites, Dominicus scilicet et Demetrius filij Nycolai, ac Petrus filius Johannis fiilij Farkasij, ipsis sexaginta marcis ab ipso Comite Nycolao plenarie receptis, ipsum Comitem Nicolaum et suos heredes ac successores racione predicte possessionis Feketeupotok uocate processu temporum sibimetipsis silencium pepetuum inponentes coram nobis, ab omnibus molestare seu inquietare uolentibus defensare assumpserunt proprijs ipsorum laboribus et expensis. Vt autem series ipsius inuiolabiliter possit permanere, partes nos instanter rogauerunt, ut nostro priuilegio premissa intenderemus confirmare. Nos igitur iuste peticioni parcium annuentes causa iusticie omnia premissa redegimus in scriptum et apposicione pendentis sigilli nostri duximus confirmanda pro rei memoria sempiterna, et inuiolabiliter obseruanda. Datum in festo Natiuitatis Beati Johannis Baptiste anno Domini Mş CCş nonagesimo quinto. Domino Demetrio Preposito, Johanka Lectore, Chanadino Cantore et Martino Custode magistris Ecclesie nostre existentibus.
(Eredetie a gr. Károlyi család levéltárában.)