Nicolaus Episcopus seruus seruorum Dei carissimo in Christo filio S. Regi Servie salutem et Apostolicam benedictionem. Quoniam inter cetera mentis nostre desideria illud insidet potissimum cordi nostro, ut fides Catholica, quam tenet, profitetur et docet Sacrosancta Romana Ecclesia, mater universorum fidelium et magistra, votivum et Deo acceptum suscipiat, eo propitio, nostris temporibus incrementum; grandi nimirum exultatione perfundimur, cum ad nostrum pervenire contingit auditum, quod mundi Reges et Principes Regis eterni, cuius negotium geritur principalius in hac parte, se beneplacitis coaptantes ad ampliandum cultum fidei orthodoxe magnitudinis sue colla subiciunt, et ascendentibus ex adverso virtute inducti ex alto prompte, sollicite studiose opponunt. Sane cum tu, fili carissime, zelo fidei ac devotionis accensus per dilectum filium Marinum Archiepiscopum Antibarensem, tue Celsitudinis Nuntium, Apostolatui nostro duxeris humiliter supplicandum, quod cum in partibus Bosne tue ditioni subiectis sint quam plurimi heretica pravitate infecti, qui a semita veritatis adversi per falsitatis devium dampnabiliter oberrantes, in eterni Regis contemptum, animarum suarum evidens periculum et scandalum, fidem Catholicam depravare pernitiosis seu pestiferis suis assertionibus multipliciter moliuntur, aliquas personas ydoneas regionis illius ydiomatis non ignaras, quarum conversatio cum salutari eorum doctrina concordans, intuentibus normam honeste vivendi tribuat, et exemplum prebeat puritatis, mittere dignaremur ad partes easdem; ut huiusmodi erroris eliminata caligine, ministerio eorundem habitatores illarum partium ad agnitionem vere fidei, superni luminis irradiante gratia, salubriter reducantur; tuum offerens consilium et auxilium ad errorem eundem de dictis partibus radicitus extirpandum. Nos, qui licet immeriti Jesu Christi, Regis eterni, humani generis redemptoris, vices gerentes in terris grandi desiderio singulorum salutem appetimus, et ad ampliandum cultum fidei Christiane, submotis quibusvis obstaculis, totis desideriis aspiramus, de huiusmodi tuo laudabili et salubri proposito intra mentis nostre precordia exultantes multiformiter, et Regi Regum proinde ad gratiarum actiones supplices assurgentes supplicationi huiusmodi ex fervore magne devotionis et integritate fidei procedenti favorabiliter duximus annuendum; dilecto filio ... Ministro Ordinis fratrum Minorum Provincie Sclavonie, qui personarum sui Ordinis plenam habet notitiam, dantes per alias nostras litteras in mandatis; ut auctoritate nostra duos eligat ex eodem Ordine fratres ad predicta ydoneos, qui sint vita et conversatione probati, litterali scientia prediti et regionis illius ydeomatis non ignari, quos ad memoratas partes dirigat pro eliminanda ex eisdem partibus heretica pravitate, ac fide Catholica inibi Divina cooperante gratia salubriter amplianda. Magnificentiam itaque tuam rogamus, monemus et ira Jesu Christo nostre salutis auctore, cuius negotium geritur, attentius exhortamur, quatenus fratres predictos ad prosecutionem predicti negotii per dictum Ministrum auctoritate nostra, ut premittitur, eligendos, cum ad te pervenerint, intuitu Dei Omnipotentis et ob reverentiam Sedis Apostolice atque nostram, qui te velut benedictionis filium carissimum sincera in Domino prosequimur caritate, benigne, ut Regiam decet Celsitudinem, recipias, ipsosque recommendatos habeas, et in prosecutione prefati negotii favorem, consilium et auxilium eisdem impendas, ut dextera Magnitudinis tue freti, dictum negotium ad Dei laudem, Christiane fidei exaltationem et tui nominis honorem efficaciter et salubriter perducere valeant ad effectum, tuque a retributore bonorum omnium, qui pro minimis grandia recompensat, post vite presentis exitum eterne beatitudinis premia proinde consequaris. Datum apud Urbem-Veterem X. kal. Aprilis, Pontificatus nostri anno quarto.
In. e. m. carissime in Christo filie Helene Regine Servie Illustri.
(IV. Miklós pápa Regestáiból. Theiner id. m. t. k. 377. l.)