Nicolaus Episcopus seruus seruorum Dei dilecto filio ... Ministro Ordinis Minorum Provintie Sclavonie salutem et Apostolicam benedictionem. Pre cunctis nostre mentis desiderabilibus Catholice incrementum fidei affectantes, nimio utique dolcre replemur, cum audimus aliquos vel sentimus ad illius depressionem qualicunque malignitate satagere, vel dampnabilibus ipsam depravando reprehensionibus aut detractionibus ei abrogalibus derogando, seu commentis eandem mordacibus pervertendo, ad quorum iniqua consternenda molimina eo animosius aspiramus, quo in animarum stragem pernitiosius eos agnoscimus conspirare. Sane, sicut accepimus, in Principatu Bosnie, carissimo in Christo filio nostro S. Regi Servie Illustri subiecto, adeo infidelitatis error invaluit, quod ibi quam plurimi a via veritatis prorsus adversi, euntes per devia falsitatis, pestiferas ad concutiendum orthodoxe murum fidei machinas construant, molientes ipsum fallacium argamentationum impulsibus demoliri. Verum licet ubilibet Sedis Apostolice diligentia contra talium dolosam astutiam, ne diffusius huiusmodi serpat morbus, remedium libenter adhibeat oportunum, tamen in Principatu predicto cupientes anxie, ut negotium fidei iugi profectu, elisis omnino quibuslibet erroribus, fortius invalescat, studemus ad hoc per nos et alios attentius vigilare. Providimus igitur in predicto Principatu ad presens personas aliquas circumspectas pro tanto negotio deputare, quarum honesta conversatio exemplum tribuat puritatis, et doctrinam fundant erudita labia salutarem, ut sacro ipsarum ministerio Principatus predictus ab huiusmodi contagiis expurgetur. Verum quia de prudentie tue industria firmam in Domino fiduciam obtinemus, discretioni tue per Apostolica scripta firmiter precipiendo mandamus, quatenus de consilio aliquorum fratrum discretorum tui Ordinis eligas duos de fratribus eiusdem Ordinis tue administrationis, ydoneos ad huiusmodi opus dominicum exercendum, qui videlicet sint vita et conversatione probati, litterarum scientia prediti, et regionis sive provincie prefate ydeomatis non ignari, eisque in virtute obedientie districte Apostolica precipere auctoritate procures, ut inquisitionis officium in dicto Principatu contra hereticos, credentes, fautores, defensores et receptatores eorum iuxta formam in aliia nostris litteris expressam, quas fratribus predicti Ordinis Inquisitoribus huiusmodi pravitatis in Principatu eodem auctoritate Apostolica deputandis, non expressis aliquorum nominibus, super exequendo dicto Inquisitionis officio destinamus, exequi studeant diligenter. Nos enim predictos duos fratres, quos ad hoc elegeris, et utrumque ipsorum, prefatum officium exequi inxta formam in litteris ipsis expressam, ac ipsos illam potestatem et auctoritatem plenarie habere volumus, que in eisdem litteris continentur. Si vero tu, vel Vicarius tuus, te absente, aliquem Inquisitorem huiusmodi ex aliqua forte causa nonnunquam fore videbitis amovendum, ipsum amoveatis et substituatis loco eius alium, quem similem potestatem et auctoritatem habere volumus, quotiens vobis deliberatione cum aliquibus discretis fratribus dicti Ordinis prehabita, hoc fore videbitur faciendum. Et si aliquem, vel aliquos Inquisitorum ipsorum, decedere forte contigerit, nos substituendi de consilio aliquorum discretorum fratrum eiusdem Ordinis alium vel alios loco illius vel illorum, qui decesserint, ita quod huiusmodi substituti eisdem omnino auctoritate ac potestate fungantur, tibi dictoque Vicario, si tu absens fueris, plenam et liberam concedimus tenore presentium facultatem. Datum apud Urbem-Veterem X. kalendas Aprilis, Pontificatus nostri anno quarto.

(IV. Miklós pápa Regestáiból Theiner id. m. I. k. 378. l.)