Andreas Dei gratia Hungarie, Dalmacie, Croacie, Rame, Servie, Gallicie, Lodomerie, Cumanie, Bulgarieque Rex, omnibus Christi fidelibus presentem paginam inspecturis, salutem in eo, qui est vera salus. Quod Regia auctoritate sancitur, perpetuo innititur fundamento firmitatis. Proinde ad vniuersorum noticiam harum serie volumus peruenire: quod Comes Dyonisius filius Jurk in nostre Majestatis presencia constitutus humili suplicacione a nostra Serenitate postulauit, vt dimidietatem terre Raduana, cujus aliam medietatem Dominus Rex Ladislaus felicis recordacionis frater noster patruelis mediante suo priuilegio eidem dinoscitur contulisse, prout in ejusdem domini Ladislai Regis priuilegio nobis exhibito vidimus contineri, simul cum terris piscatorum nostrorum, que nostre pertinent Majestatis collacioni, misso homine nostro metis distinctis eidem conferre dignaremur. Nos igitur attendentes fidelitates et seruicia meritoria eiusdem Comitis Dionisii, que nobis in omnibus expedicionibus nostris et Regni nostri cum feruore supreme fidelitatis laudabiliter impendit et deuote, non parcendo suis rebus aut persone, peticionem ejusdem - - - de consensu et consilio venerabilium patrum domini Lodomerii Strigoniensis et Johannis Colocensis Dei gratia Archiepiscoporum, Dominici Magistri Tauarnicorum nostrorum et magistri Demetrii Comitis de Zolum, nec non et aliorum Baronum nostrorum admittere in premissis cum effectu volentes statuimus, vt ipse due dimidietates seu partes terre Raduana, simul cum aliis particulis de terris piscatorum nostrorum additis, per magistrum Alexium aule nostre fidelem Notarium et Philippum Vice-Comitem de Zoulum reambulate metis distinctis, eidem Comiti Dionisio, Thome et Nicolao filiis suis perpetuo possidende statuantur. Qui quidem magister Alexius et Comes Philippus presentibus et conuocatis omnibus commetaneis et vicinis, et specialiter Samuele, Preuchel et Michaele filiis Sauli, et hospitibus de Bezterchebana, populis nostris de Keremchey et Ceged, nullo penitus contradictore existente ipsi Comiti Dionisio et pretactis filiis suis statuisset distinctis metis tali modo: Quod incipiendo a quo dam puteo, qui est sub alpe, per quam transitur in Turuch juxta magnam viam, ut in eadem via eundo cadit in fluuium Chevnichey; in eodemque fluuio descendendo inferius abhinc venit ad magnam viam similiter de Turuch, que separat a metis ciuitatis de Bezterchebana, et eundo in ipsa magna via cadit in riuulum Udurnya versus Goron, et sic transit Goron directe ascendit ipsa meta ad montem Urpyn per quemdam verticem lapideum, et sic transiens vadit in vertice montis Urpyn circa vnum pratum, quod pertinet ad terram Raduana usque ad finem ipsius montis; deinde declinat versus partem dextram ad quemdam monticulum communem, et ibi vadit in capite riuulorum, qui currunt de ipso monticulo in Goron, et ibi vadit ad meatum cujusdam riuuli, ubi eciam particula silue, que Buykbyky vocatur, qui meatus riuuli separat terram Raduana a terra filiorum Sauli, et sic in ipso riuulo vadit in Goron; parumque descendendo in Goron exit in quemdam fluuium Kainukpotok vocatum, qui fluit in Goron a parte septemtrionali, et sic ascendens vadit vsque ad caput ipsius fluuii, vbi eciam est vna magna arbor, que vulgariter twlg dicitur, que separat terram Raduana a terra Keremchej; deindeque ascendit ad vnam siluam magnam vbi cadit in fluuium Malaho, et sic ascendit vsque ad caput fluuii; deinde descendens venit circa domum Ceged in eodem fluuio, et deinde exiens vadit ad viam, que ducit in Turuch, et sic in ipsa via vadit vsque ad fluuium Udurnya, et ita parum ascendendo exit ad alium riuulum, qui transit ad quasdam virgultas, vbi eciam est vnus puteus, et deinde tendit versus magnam siluam, et in illa magna silua vadit ad vnum montem, qui Aryuberych dicitur; deinde vadit ad Iuanche et sic transiens per quendam beyerch, qui separat de Turuch, redit ad eundem puteum vbi incipiebatur, et sic terminabatur. In cujes rei memoriam seu donacionis firmitatem eisdem Comiti Dionisio, Thome et Nicolao filiis suis ac eorum heredibus heredumque suorum successoribus, vt eedem terre per ipsos more aliorum nobilium in Comitatu de Zoulum possessiones habencium inretractabiliter possideri valeant et haberi, presentes concessimus litteras duplicis sigilli nostri munimine roboratas. Datum per manus discreti viri magistri Theodori Albensis Ecclesie Prepositi aule nostre Vice-Cancellarii, dilecti et fidelis nostri, anno Domini M. CC. nonagesimo primo, Regni autem nostri anno secundo.

(A kir. fiscus és Beszterczebánya sz. k. város közti permelléklet.)