Nicolaus Episcopus seruus seruorum Dei carissime in Christo filie E. Regine Ungarie Illustri salutem et Apostolicam benedictionem. Nuper ad nostrum pervenit auditum, quod quondam ... Rex Ungarie, maritus tuus, rebus est humanis exemptus. Porro, carissima in Christo filia, tibi super tue persone statu multis turbationibus hactenus fluctuante, dum Rex ipse viveret, compassi fuimus ex affectu, nec illo desinimus compati iam defuncto, quin tibi, quam affectione paterna prosequimur, eo libentius oportunis consiliis, favoribus et auxiliis assistamus, quo illis quodammodo amplius nosceris indigere. Unde nos huiusmodi circa te affectum nostrum volentes ostendere per effectum, venerabilibus fratribus nostris B. Episcopo Eugubino, quem ad Regnum Ungarie, commisso in eo sibi et in nonnullis aliis partibus plene legationis officio, mittimus, ac etiam Sirigoniensi Archiepiscopo per nostras speciales et diversas litteras te propensius et affectuosius commendamus. Rogamus itaque Celsitudinem tuam et hortamur in filio Dei Patris, quatenus pro nostra et Apostolice Sedis reverentia, spiritu consolationis assumpto, ad Legatum et Archiepiscopum supradictos in tuis recurras oportunitatibus confidenter. Nos enim ipsis per easdem iniungimus litteras, ut dotalitia et alia bona tua manutenere studeant et tueri, tibique super illis tanquam devotissime Sedis Apostolice filie se reddant favorabiles et benignos, quibus tam super mora tua, quam super exitu de Ungarie partibus aperire poteris votum tuum. Datum apud UrbemVeterem V. Idus Septembris, Pontificatus nostri anno tertio.

(IV. Miklós pápa Regestáiból, Theiner Monumenta stb. I. köt. 369. l.)